नायिका बेनिशा हमाललाई बाल्यकालमा सेतो एप्रोनमाथि स्टेथेस्कोप झुन्ड्याएर चिटिक्क परेर हिँड्ने डाक्टरहरू बिछट्टै आकर्षक लाग्थे । अभिभावकसँग स्वास्थ्य संस्थाजाँदा सबैलाई निरोगी बनाउँन चाहने ती सुकिला कोटधारीका ठाउँमा आफ्ना बाबालाई राख्थिन् उनी । उनलाई लाग्थ्यो ‘मेरा बा पनि डाक्टर भए हुन्थ्यो ।’

ठूलो हुँदै जाँदा उनको आफ्नै रहर भने अन्तै पलायो । सानोमा सेतो ड्रेसप्रति जत्ति आकर्षित थिइन्, पछि उनलाई त्यत्तिकै मात्रामा सेतो पर्दाले तान्न थाल्यो । सेतो पर्दामा देखिन  राम्री त हुनैप¥यो । ‘राम्री हुन के गर्नुपर्छ ?’ उनले सोच्न थालिन् । त्यतिबेला अरु आइडिया के नै सोच्न सक्थिन् ? उनलाई लाग्यो, ‘सफासुघर रहनुपर्छ ।’ सानैदेखि सफा भएर चिटिक्क पर्ने बानीले राम्री मात्र बनाएन, स्वस्थ हुन पनि सहयोग पु¥यायो ।

तर बेनिशाले सानोमा सेतो ड्रेस र स्टेथेस्कोपप्रति जागेको रहर पुरा गर्न भने भुलिनन् । ‘रियलमा होइन रिलमा,’ हाँस्दै भनिन् ।  रुपा विष्टले गाएको गीत ‘म नारी हुँ’मा डाक्टर भएर अभिनय गरेकी छिन् उनले । ‘एकैछिन अभिनय गर्न त रमाइलो हो, तर सधैँ त्यही जिम्मेवारी निर्वाह गर्न निकै चुनौतीपूर्ण हुन्छ होला,’ रिलको डाक्टरी अनुभव सुनाइन् ।

उनलाई जन्डिसले धेरै सताउँछ । त्यसैले कयौं पटक डाक्टर भेटेकी छिन् । ‘काठमाडौँको पानीले गर्दा तीनपटक जन्डिस भइसक्यो,’ उनले भनिन् । धुवाँ धुलोका कारण उनलाई रुघाखोकी र स्किन एलर्जीको समस्या पनि छ । त्यसैले मास्क अनिवार्य जस्तै छ । ‘स्कुटीमा हिँड्ने भएकाले पनि मास्क नबिर्सि लगाउँछु,’ उनले भनिन् ।

सानैदेखि खुब एक्सरसाइज गरिन् बेनिशाले । ती न सुन्दरताका लागि थिए, न स्वास्थ्यका लागि नै । तर ती खेलहरूले पनि स्वस्थ राख्न धेरथोर सघाए भन्ने उनलाई महसुस हुन्छ आजकाल । ‘म फुटबल स्किपिङ खुब गर्थेँ,’ बाल्यकाल सम्झिइन् । आठ कक्षासम्म आइपुग्दा फुटबलमा छात्राका तर्फबाट उनलाई टीम क्याप्टेन बनाइयो । विद्यालयभित्र र बाहिरका धेरै प्रतियोगीतामा सहभागी भयो उनको टीम । स्किपिङ त अहिले पनि गर्छिन् । ‘त्यतिबेला रहरले थियो, अहिले करले,’ उनले भनिन् । ज्यान स्लिम बनाउन स्किपिङले सहयोग गरेको छ उनलाई ।

सुन्दरता र स्वास्थ्यका लागि बे दुई वर्षदेखि भात खान छाडेकी छन् । ‘त्यसको सट्टा अन्य पोषिला खानेकुरा खान्छु,’ उनी भन्दै थिइन् । सुटिङमा पनि उनले आफ्नो खानेकुराको पहिल्यै व्यवस्था गर्छिन् वा गर्न लगाउँछिन् । ‘प्रायःजसो फ्रुटहरु नै लगेर जान्छु,’ उनले भनिन् । बेनिशा मांसहारी हुन्, मासुभन्दा माछा धेरै खान्छिन् । स्किन राम्रो बनाउने भएकाले माछा बढी खाने गरेको उनको भनाई छ । पानी धेरै पिउने त बानी नै भैसक्यो । जन्डिस भएका बेला डाक्टरले भनेका थिए, ‘पानी धेरै पिउनुपर्छ ।’ त्यही सल्लाह पछ्याउँदै जाँदा बानी परेको उनले बताइन् ।

चारवटा फिल्म र ५० भन्दा बढी म्युजिक भिडियोमा देखिइसकेकी बेनिशाले नियमित स्वास्थ्यजाँच चाहिँ गर्दिनन् । ‘यो बारेमा थाहा त छ तर अहिलेसम्म नियमित स्वास्थ्यजाँच गर्न गएकी छैन,’ उनले ढाँटिनन् । रोग नलागी अस्पतालको ढोका नढक्ढक्याउने भएपनि नियमित स्वास्थ्य जाँच गराउनु राम्रो बानी भएको उनको धारणा छ ।

हाम्रो समाजमा धेरै जनासँग सामान्य रोगको उपचार गर्नसक्ने क्षमता नभएकाले बेनिशालाई लाग्छ, यसका लागि सरकारले पहल गर्नुपर्छ । यसमा आफूजस्ता सार्वजनिक  छवी भएकालाई प्रयोग गर्दा प्रभावकारी हुने आइडिया छ उनीसँग । परिवर्तित समाज र वातावरणले गर्दा स्वास्थ्यमा समस्या बढ्दै गएको महसुस गरेकी छन् । ‘एकातिर विश्वव्यापीकरणको प्रभावले निथ्रुक्कै पारेको छ हामीलाई, अर्कातिर अझैं दुर्गम वस्तिमा  समाजको डरले रोग लुकाउनुपर्ने अवस्था छ,’ उनी सुनाइन् ।
बेनिशालाई रिस काबुमा राख्न मुस्किल पर्छ । तर त्यही कारण लामो समय तनाव लिन्नन् । त्यसैले स्वास्थ्यमा रिसको प्रभाव कम छ । रिस, डाह, तनाव सबैसँग हुन्छ् त्यसको व्यवस्थापन राम्रो गर्न सक्यो भने स्वास्थ्यलाई फाइदा पुग्ने उनको ठम्याइ छ ।